Սեպտեմբերի 25-ին  քաղաքի  օրվա տոնակատարությունը կատարվեց արդեն ավանդական դարձած «Մշակութային վերածնունդ»  գորգագործության և կիրառական արվեստի հանրապետական փառատոնի համակցությամբ:

Քաղաքային հրապարակում տեղադրված  գեղեցիկ տաղավարներում ցուցադրվում էին հանրապետության  մարզերի և Արցախի հայկական գորգերն ու կարպետները, հայ ոսկեձեռիկ վարպետների ձեռքի աշխատանքները: Ներկայացված էր նաև հայտնի  «Մեգերյան կարպետը»:

Ներկաներին տոնի առթիվ շնորհավորեցին ՀՀ տարածքային կառավարման և զարգացման նախարարի պաշտոնակատար Դավիթ Լոքյանը, Տավուշի մարզպետ Հովիկ Աբովյանը, Դիլիջանի համայնքի ղեկավար Արմեն Սանթրոսյանը:

Բանախոսները իրենց ելույթներում անդրադարձան  քաղաքի տնտեսական և մշակութային զարգացման առաջընթացին, կարևորելով  տարբեր ոլորտների, հատկապես մշակութային և զբոսաշրջային լայն հեռանկարները:

 Իր խոսքում Դիլիջանի համայնքի ղեկավար Արմեն Սանթրոսյանը իր երախտագիտությունը արտահայտեց ՀՀ Կենտրոնական  բանկի  տնօրինությանը և «IdeA»  հիմնադրամի համահիմնադիրներ, բարերարներ Ռուբեն Վարդանյանին և Գագիկ Ադիբեկյանին Դիլիջանում  խոշոր բարեգործական ծրագրերի իրականացման համար: 

Արմեն Սանթրոսյանը նաև  գոհունակությամբ նշեց, որ    «Մշակութային վերածնունդ»  հանրապետական փառատոնը արդեն երրորդ տարին է, որ կազմակերպվում է Դիլիջանում և այդ կապակցությամբ  շնորհակալություն հայտնեց  միջոցառման կազմակերպիչ,  «Մեդիա Օնիքս»  ընկերության տնօրեն Մարիա Մինասյանին:

Տոնակատարությանը արժանին մատուցվեց հայոց անկախ պետականությանը, նրա 25-ամյա հոբելյանին:

Հնչեցին խիզախների անունները: Հարգանքի և մեծարանքի խոսքեր հնչեցին 90-ականների ազատամարտի նահատակների   ու  ապրիլյան քառօրյա պատերազմում հերոսաբար զոհված  Վլադիմիր Ալիխանյանի  ու  հայրենիքի մյուս նվիրյալ զավակների մասին:

Միջոցառման ժյուրիի կողմից «Երախտագիտության» մրցանակ շնորհվեց  ավագ լեյտենանտ, «Մարտական խաչ  2-րդ  աստիճանի» և  «Մարշալ Բաղրամյան»  շքանշանների ասպետ Ռուբեն Սանամյանին:

Հարուստ էր միջոցառման գեղարվեստական ծրագիրը: Ներկաները մեծ բավականությամբ ունկնդրեցին Դիլիջանի արվեստի պետական քոլեջի, Հովհ. Շարամբեյանի անվան գեղարվեստի դպրոցի պարի խմբի և մարզերից ժամանած գեղարվեստական խմբերի ելույթները:  Հանդես եկան նաև սիրված երգիչներ Խաչիկ Ղազարյանը և Սամվել Ղասաբյանը:

Միջոցառմանը ներկա էին Կոտայքի մարզպետ Կարապետ Գուլոյանը, Գեղարքունիքի մարզպետ Ռաֆիկ  Գրիգորյանը, ՀՀ մշակույթի փոխնախարար Ներսես Տեր –Վարդանյանը, ՀՀ տարածքային կառավարման և զարգացման նախարարության վարչության պետ, զբոսաշրջության  ոլորտի պատասխանատու Մեխակ Ապրեսյանը, վարչության պետ Աշոտ Գիլոյանը և այլ պաշտոնատար անձինք: